شماعة

فضل الحمد

2008-05-12T11:01:00.000-07:00

كلمتان خفيفتان على اللسان حبيبتان إلى الرحمن ثقيلتان في الميزان

سبحان الله وبحمده سبحان الله العظيم

جايز

2007-09-01T13:29:00.001-07:00

جايز ويمكن من عارف محتملاً يدوب

هايم وبحلم وشايف وبسأل وبتوه

لازم وحتما حقيقي وفعلا وأكيد

خايف وساكت ودايب وشاري وحزين

فترة نقاهة

2007-08-20T10:14:00.000-07:00

فيها أية لو كل واحد بيعمل حاجة غلط (مهما كان حجمها) يأخذ فترة نقاهة ويعيش في فترة سلام مع نفسه، من غير ما يراكم عليها ضغوط تزود إحساسه بتأنيب الضمير وبالتالي تؤدي تدريجيا لتشويه نفسه من الداخل.

أنا مش ملاك ولا معصوم من الخطأ، أنا بتمني أن أستطيع التحكم في نفسي عندما أوجه موقف ما، ولا أصر علي فعل الخطأ.

لو كل واحد فينا عمل كده هنشعر براحة نفسية رهيبة داخلية وتصالح يؤدي إلى الراحة نفسية المتكاملة، وعند ذلك الوقت نقدر نعيش في سلام داخلي افتقده كثير منا وأنا أولكم بالتأكيد.

البقاء لله

2007-08-14T10:14:00.000-07:00

حاجة صعبة جدا حسيت بيها لما دخلت عن طريق الصدفة إلى مدونة فتاة اسمها شيماء لما قرأت المدونة الخاصة بها وجدتها قد توفيت إلى رحمة الله تعالي وكانت مصابة بمرض لم تفصح عنه، وتوفت أثناء مرحلة المرض التي مرت بها.

شيء صعب جدا أن الواحد يسمع أن في حد مات، والذي لم أكن متخيله أن ممكن أصادف "مدون" توفي والناس بترسل التعازي له عن طريق البلوجر الخاص به. إحساس صعب جدا، موت شيماء التي لا أعلم من هي وأين تعيش ذكرتني ـ والله يعلم أني ما نسيت أبدا ـ بموت صديقي عمرو رحمه الله مات هو الآخر منذ عام في ليلة الإسراء والمعراج بمرض في المخ أثر عليه بعد العملية ألزمه البيت عام كامل وتوفي بعد ذلك.

وفاته أثرت فيا جدا لأنه كان صديق المرحلة الثانوية كان صديقي الوحيد ملامحه تتضح الآن أمام عيني ضحكاته تتراقص أمام عيني صوته اسمعه الآن اسمعه يناديني، كان فراقه صعب جدا، والشيء الذي جعلني أشعر بالذنب تجاه أني للأسف بسبب ظروف خاصة لم أستطيع رؤيته أثناء فترة مرضه، والمرة الوحيدة ومنذ نحو عامين قبل وفاته لم أقابله، إلا وهو مكفن داخل نعشه، كانت أتمني أن ألقي نظره عليه قبل أن يواري الثرى و اقبله بين جبينه وأتحدث معه ولو كلمة واحدة لكن الموت هو الموت.

رحمك الله يا "عمرو" يا صديقي يا من سبقتني إلى القبر وأدعو الله أن يكون روضة من رياض الجنة وأن يفسح عليك قبرك وأن يؤنس وحدك ويغفر لك ذنوبك ويجعلك من الذين قال الله عنهم " يَا أَيَّتُهَا النَّفْسُ المُطْمَئِنَّةُ ارْجِعِي إلَى رَبِّكِ رَاضِيَةً مَّرْضِيَّةً فَادْخُلِي فِي عِبَادِي وادْخُلِي جَنَّتِي" ، "فَأَمَّا مَنْ أُوتِيَ كِتَابَهُ بِيَمِينِهِ فَيَقُولُ هَاؤُمُ اقْرَءُوا كِتَابِيَهْ إنِّي ظَنَنتُ أَنِّي مُلاقٍ حِسَابِيَهْ فَهُوَ فِي عِيشَةٍ رَّاضِيَةٍ فِي جَنَّةٍ عَالِيَةٍ قُطُوفُهَا دَانِيَةٌ كُلُوا واشْرَبُوا هَنِيئاً بِمَا أَسْلَفْتُمْ فِي الأَيَّامِ الخَالِيَةِ". اللهم أغفر لعمرو ولشيماء ولجميع المؤمنين والمؤمنات الأحياء منهم والأموات.

بلوجر شيماء ( http://shikoonline.blogspot.com/ )

مصيبة

2007-07-07T09:03:00.001-07:00

فيه مصيبة أنا اشتركت فيها من غير ما أعرف، وهي أنا شاركت في بناء تمثالي بوذا في أفغانستان اللي هَدتهم حركة طالبان سنة 2001، لأني قمت بالاشتراك في التصويت اللي كانوا عملينه من مدة عشان يختاروا عجائب الدنيا السبع الجديدة.

فقلت أدخل علي الموقع الخاص بالتصويت وأقول رأيي في عجائب الدنيا السبع الجديدة ، ولكن للأسف بعد اختيار عجائب الدنيا قرأت في الصحف أن عائدات حملة التصويت اللي شارك فيها 70 مليون شخص من العالم من خلال الانترنت والرسائل الهاتفية القصيرة "إس.إم.إس" هيصرفوها على إعادة بناء تمثالي بوذا اللي اتهدوا في أفغانستان.

بقي برنار ويبر" منتج الأفلام السينمائية، اللي نادى بإعداد قائمة جديدة لعجائب الدنيا من جديد، عمل كل ده عشان يبني تمثالي بوذا ومحدش أتحرك عشان الهندوس في سنة 1993 هدموا المسجد البابري التاريخي في الهند حتى آخر حجر فيه، والذي كان عمره يزيد على 600 سنة، ولا الدبابات الصربية اللي كانت بتصوب قذائفها لهدم مآذن مساجد سراييفو التي بنيت منذ 500 سنة وذلك في الأعوام (1993 ، 1995)، ولا المساجد اللي بتتهد كل يوم في العراق، والمصيبة الكبرى اللي بتعمله إسرائيل من حيل خسيسة لهدم المسجد الأقصى المبارك حوله.

أنا ندمان أشد الندم عشان اشتركت في بناء تمثال وثني يتعبد من غير الله سبحانه وتعالي.

سيراميك

2007-07-02T05:09:00.000-07:00

لو أنت مرتبط وقربت تتجوز، عايزك تجهز نظارة شمس وطاقية وورق كتير وكام قلم وتجهز معاهم يجي كام الف جنيه، عشان تبدأ رحلة تشبه رحلة الرحالة ابن بطوط، وتبدأ الرحلة بالفجالة وبعدين في أرض عزيز عزت في إمبابة وبعدين تتجه شمالا إلى سوق ترسا بفصيل وبعدين تتجه ناحية الجنوب إلى سوق المرج اللي جمب الدائري، والرحلة المكوكية ديه اللي مش هتنساها أبدا هتكون عشان تحقق هدف "غالي" وهو أنك تشتري ... سيراميك، يا له من أسم "سي را مي ك" تحسن انه اسم مستخلص من السلم الموسيقي دو ري مي فاصوليا.

وأنا بما أني بجهز نفسي عشان اتجوز، فقمت من كام يوم عملت رحلة مكوكية علي أسواق السيراميك الموجودة جمب مني.

بدأت الرحلة وأنا طبعا جاهز بنظارة الشمس، وقلم وورق ملوش عدد عشان أكتب أسعار السيراميك اللي عجبني ، وعشان أقدر أقارن بين الأنواع والأسعار علي رواقة في بيتنا.

وبعد كام جولة مستميتة رجعت بكروت من أصاحب المحلات اللي زورتها، ومن كترها عملت ليا زحمة في دولابي وفي دماغي، وقعت أفحص وأدرس الأسعار والعروض عشان اقدر اخذ قرار و"سرمك الشقة".

وبعد ما خلصت يجي برادين شاي عشان أظبط "دماغي" استقرت علي المكان اللي هشتري منه السيراميك، وبدأت رحلة ثانية رحلة محددة لمكان واحد ولهدف واحد، وجبت سيراميك تحفة والحمد لله وعقبالكم جميعا.

وانا بحكي لواحد صحبي بعد ما جبت السيراميك واللي شفته من دوخه عشان اشتريته قالي حاجة غريبة قوي وهي أنه لما يروح يتقدم ويخطب واحدة هيشرط علي اهلها انه يجهز غرفة واحدة بس وهم يجهزوا باقي الشقة، طبعا جيه في بالي الغرفة ديه تكون مثلا غرفة النوم أو الصالون او غرفة الاطفال بس للأسف كل التخمينات ديه طلعت غلط ، وطلعت الغرفة اللي عايز يجهزها هي "البلكونة"... بصلته وانا مستغرب وقولتله يعني أنت لازم على كده تجيب كرسين هزاز، وقفص عصافير، ومشاية، وتجيب نجفة كريستال عصفور، وحوالي 3 أو 4 متر سيراميك يدوبك تكفي البلوكونة، طبعا بالإضافة إلى حبل غسيل ومشابك اللي هيجبها من أفخر أنواع الخشب، شوفوا بقي الحاجات ديه كلها هتكلفه أد إيه فلوس كتتتتير جدااااااااا

تاج لأول مرة

2007-06-25T01:07:00.000-07:00

."جزء مني".. أرسلت ليا التاج ده عبر الانترنت وها جاوب عليه من غير لف ولا دوران
عشان أنا "بدوخ" بسرعة

أنت مين ؟

أنا كريم بن فؤاد

مين اكتر 6 أشخاص بتحبهم ؟

طبعا حبايب قلبي ميتعدوش لأني بحب كل الناس، بس أكثر ناس بحبهم أسرتي الصغيرة المكونة من والدي العزيز وأمي الحبيبية ، وأخوتي
عبد الله ومروة ومصطفي ، بالإضافة طبعا إلى خطيبتي ونور عيوني.

أنت سعيد؟

في الوقت الحالي وأنا بجاوب الأسئلة لا أشعر بالسعادة.

لو اجتمعت أنت وحسني مبارك في غرفة واحده؟

أول حاجة هطلب منه ينشر العدل وسط الناس، ثاني حاجة يوفر فرص عمل للشباب اللي قاعدين علي القهاوي ليل نهار.

لو معاك مليون ونص جنيه......تعمل
بيهم ايه؟

نفسي ابني مسجد يشبه المسجد الأقصى، وبعد كده الفلوس اللي تتبقي هعمل بيها مشروع عشان أساعد نفسي وأساعد ناس كتير غيري.

بتحب مصر؟

مصر بلدي التي لا أعرف غيرها ولا أعشق تراب غير ترابها .

بتحب البنات؟

زمان أه كنت بحب البنات، بس الآن بحب خطيبتي وبس، انتم فهمين البلوجر له ودان، وخايف لو قلت حاجة تانية الكلام يوصل لحكومة
خطيبتي، ويبقي نهاري ملوش ملامح ويتحكم عليا بالحبس الانفرادي داخل شقة الزوجية في أقرب وقت.

أنت مسلم؟

الحمد لله علي نعمة الإسلام وكفا بها نعمة.

ليه؟

أن الدين عند الله الإسلام

مين اكتر شخصية ما تقدرش تستغنى عنها في حياتك ؟ وليه ؟

أكثر شخصية هي والدتي لأنها أغلي عندي من الدنيا، هي احلي وأجمل وأغلي شخصية تعشقني في هذه الحياة.

ليه ؟ عشان هي سبب وجودي في هذه الدنيا.

إيه اكتر موقف محرج أتعرضت ليه في حياتك؟ واتصرفت أزاي ؟

أمتنع عن الرد.

إيه الأمنية اللي بتدعي ربنا دايما انه يحققها لك؟

أموت وأنا بأقول لا إله إلا الله محمدا رسول الله

تمرر التاج دة لمين؟

أنا وهالة

قلوب حائرة

سامحني

2007-06-20T12:24:00.001-07:00

قابلته بالأمس كان غريبا يبدو عليه شحوب الوجه وانكسار الفؤاد، فمنذ فترة طويلة لم أتقابل معه ولم استمتع بالحديث إليه بسبب كثرة مشاغل الحياة، وفي شغف شديد بادرته بالسؤال عن أحواله وعن ما آل إليه في هذا الدنيا المتشاحنة بالضغوط، فكانت الإجابة مليئة بالغموض بالنسبة لي حيث لم أفهم منه أسباب ذالك التغيير الجذري في أحواله.

فما كان مني إلا أن بادرته بالحديث عن أحوال الماضي وذكرياته الجميلة المليئة بالمفارقات وبدأت بالضحك على تلك المواقف حتى أخرجه مما هو فيه، وأذكره بسالف العهد القديم، فكان تجاوبه معي علي غير المتوقع حيث ظل صامتا شارد الذهن حائرا.

ففضلت أن أصارحه بما أراه من تغيير عليه، وكانت إجابته أنه لا يدري أهو ذلك الشخص صاحب الجولات والصولات، التي طالما أمتعنا بها أم أنه تحول إلى شخص آخر غير الذي كان ؟

وهممت أن أسأله عن مشاعره المتجمدة بعض الشيء وعن تفاصيل حياته اليومية التي بالطبع أثرت عليه وجعلت منه شخص أخر، فكانت إجابته سابقة لسؤالي، حيث بادرني بأن ظروف عمله أثرت عليه في حياته الشخصية وغيرته من إنسان اجتماعي بدرجة امتياز إلى شيء آخر.

وعنفني صديقي علي عدم سؤالي عليه وتركه منذ فترة طويلة بدون متابعة أخباره، فكان ذلك الشيء أثر فيه بعض الشيء حيث طالما تعودنا علي متابعة كل منا أخبار الآخر ومشاركة أحزاننا قبل أفراحنا، فكان ردي عليه: رفقا بي فأنا ما زالت صديقك الوفي المخلص الذي بدونه أموت، وذلك لأن ببساطة شديدة الشخص الذي قابلته بالأمس كان "نفسي" التي لا أتذكر متى آخر مرة تحدثت إليها، وصارحتها بعيوبي وأخطائي، بسب مشاغلي وهمومي الشخصية والعملية التي أصبحت أغرق فيها حتى الثمالة، ولا أجد لها حلا جذريا ولكن يهديني الحال إلى حل موضعي لا يقتلع تلك المشكلة من جذورها.

فسامحيني يا "نفسي" علي ما فاتني من عدم مجالستك ومتابعة أخبارك التي هي في الأساس أخباري، هل تصدقيني أني أشعر الآن بالراحة لأني أتحدث معكي، يغمرني شعور غريب بالسعادة، ضحكاتي الآن تسبق ضحكاتك، أجباتي ترد على تساؤلاتك، أعاهدك علي الرجوع إلى سالف العصر ومتابعة كل أخبارك والسؤال عليك من الحين إلى الآخر.

بخيل درجة أولي

2007-06-14T03:00:00.000-07:00

وأنا جي من الشغل وعصافير بطني بتصوصو من كتر الجوع قولت أول محل بتاع أكل أعدي واتظغط فيه، وطبعا أحنا لسه في نص الشهر والمرتب خلص والحمد لله، فقعدت أحلم أني اعدي علي محل كباب وكفتة مثلا أو مسمط لكن لحظي النحس عديت علي محل كشري وطبعا دخلت وأنا مضطر لأني كنت جعان جدا جدا، وطلبت طاجن مكرونة باللحمة المفرومة وقعدت أكل.

وفي الوقت نفسه قعد اثنين في الترابيزة اللي جامبي طلبوا طبقين كشري سوبر لوكس والناس كان الظاهر عليهم مش جعانيين قوي فكلوا نص الأكل وقاموا، وقبل ما الأطباق تتشال من علي الترابيزة، دخل المحل شاب شيك ومعاه بنت هي الأخرى لا تقل شياكه عنه وكان شكلهم مخطوبين واديهم في أيد بعض وأول ما دخلوا المحل بصوا علي الترابيزات فأنا قلت في عقل بالي يمكن هما بيدورا علي تربيزة بعيدة عن الناس عشان يقعدوا يتكلموا مع بعض كلام "مخطوبين " لكن طلع تخميني غلط فاختاروا التربيزة اللي في أول المحل واللي كان عليها بواقي الطبقين اللي أصحابنا طلبوه من شوية وقاموا من غير ما يخلصوا الأكل.

فاستغربت لمكان الترابيزة اللي اختاروها فشد انتباهي أن أتابع تحركاتهم وبالفعل في خلسة من غير ما يشعروا أني ببص عليهم، لقيت الشاب أياه هو كمان قاعد بيبص يمين وشمال، ولما أتأكد أن مفيش حد متابعه قام وعمل شيء غريب، وراح مناول خطيبته طبق من طبقين الكشري اللي كانوا أمامه على الترابيزة وقام مناولها طبق، طبعا أداها الطبق الفاضي شوية وخد هو الطبق اللي فيه كشري كتير ـ مفجوع درجة أولي ـ وراح قعد ياكل في تلذذ غريب وهي الأخرى قعدت مستمتعة جدا ببواقي طب الكشري من غير ما تحتج علي الفعل اللي عمله الشاب.

وفي خمس دقائق كانت اطباق الكشري أنضف من الصيني بعد غسيله، وفي هدوء تاما قاموا ومشيوا من المحل من غير ما حد يتكلم معاهم لأنهم ببساطة نوعية من البشر اللي لو وقفت تتكلم معاهم ممكن يأخذوا الكحل من العين.

لو خطيبك أو خطيبتك عرضت عليك أنكم تعلموا عملة أصحابنا البخلاء يا تري ايه الرد اسيبكوا في التفكير ويارب ما حد يتجوز واحد أو واحدة بخيلة.

الكعبة أم العجائب

2007-06-10T11:21:00.000-07:00

يارب أرزقنا زيارة بيتك الحرام

عجائب الدنيا السبع يا له من تصنيف غريب قام به "المشمش" اليوناني "فيلون" ووضع قائمته التي دون فيها عجائب الدنيا قبل أكثر من ألفي عام، ثم جاء في الوقت الحالي "فسدقة" العصر الحديث "برنار ويبر" المغامر السويسري، منتج الأفلام السينمائية، لينادي بإعداد قائمة جديدة لعجائب الدنيا من جديد.

وفي غمرة الحديث عن عجائب الدنيا السبع وإخراج الأهرامات المصرية من مضار التصويت عليها، يوجد ما هو أهم من هذه العجائب المذكورة وتتمثل في موضوع بناء الكعبة وما تمثله من كونها أقدم أثر تاريخي في العالم وتقع في منتصف الكرة الأرضية بالتمام والكمال، فهي أول بيت وضع للناس من أجل عبادة الله جل وعلا.

ويرجع بناء الكعبة قبل وجود الإنسان أي قبل ملايين السنين، فالملائكة عليهم السلام هم الذين بنوا الكعبة المشرفة لتكون في مقابلة البيت المعمور في السماء، ثم بعد ذلك سيدنا آدم عليه السلام، إلا أنها دمرت عبر السنين ولم يبقى مكانها شيء إلى أن أوحى الله إلى سيدنا إبراهيم بمكان البيت وأذن الله تعالى لهما ببناء الكعبة ، ورفع قواعدها.

والحسابات الفلكية أثبتت أن مكة المكرمة تقع في منتصف الكرة الأرضية، وهو الأمر الذي يؤكد الإعجاز المعماري والفلكي في بناء الكعبة المشرفة، فهي بذلك مركز الأرض, وان كل ما في الأرض وما عليها وما فوقها يتجه للكعبة.

وبعد كل الكلام ديه الكعبة تستحق أن تكون أم العجائب بكل ما تحتويه من قدسية ومن عبق التاريخ فيالها من بناء عظيم تم بناءه منذ قديم الأزل. لكم أهيم بكي حبا يا بيت الله الحرام.

أربعون عاما على الحرب الثالثة

2007-06-05T03:00:00.000-07:00

الزمان 5 يونيو 2007، المكان قطعة أرض في مصر ـ مساحتها 40 مترـ لم يحتلها العدو الإسرائيلي، بس طبعا احتلها الانجليز يجي 99 سنة، وفي الذكري الأربعين لنكسة 5 يونيو تعالوا نشوف حالنا أصبح ازاي وناخد الموضوع واحدة واحدة، أولا إسرائيل احتلت كامل الأرض الفلسطينية وهضبة الجولان السورية وشبه جزيرة سيناء المصرية.

بالنسبة لمصر إسرائيل طلعت من سيناء بعد حرب 1973، والآن بتخش طابا بالبطاقة الشخصية، ولحد الآن ما زالت محتلة منطقة أم الرشراش المصرية وسمتها "ميناء إيلات" الإسرائيلي، حيث تم احتلالها في 10 مارس 1949.

أما سوريا، فإسرائيل ما زالت محتلة هضبة الجولان السورية.

وأخيرا فلسطين "الغالية" ما زالت محتلة حتى وقتنا الحالي، واللي أصبحت الآن حالها بيقطع قلوبنا من كتر ما الواحد بيشوف من جرائم تنتهك في حق شعبها.

يعني بعد أربعين سنة الحال هو الحال الاحتلال مازال قائم وإسرائيل زي ما هيا "متبتة" في الأراضي اللي احتلتها وعمرها ما هتطلع منها عشان الحال العربي لا ينبأ بأي جديد.

والصور الآتية لو عملنا ليها تعديل وخليناها ألوان بدل ما هي أبيض وأسود هنلقيها صورة طبقة الأصل من اللي بيحصل في الوقت الحالي يا خسارة وميت خسارة علي حالنا.

ودول بعض الأسري العرب لدي المرتزقة الإسرائيليين

وهنا بيقلعوا الجزم عشان المهانة تكمل

وفي الآخر غموه عشان يحسسوه أنه في إسرائيل اللي في الأساس منطقة عربية

احترسي أمامك كاميرا هاتف محمول

2007-06-03T01:46:00.000-07:00

ما أكثر المشاهد التي تتكرر كل يوم في شوارع مصر، وتستفز "اللي عنده احساس" حيث نجد العديد من الشباب يستخدمون كاميرا الهاتف المحمول ويقومون بالتقاط صورة للفتيات المارين في الشارع أو يقوم بتصوير جارته أو زميلته. حيث يقع كل هؤلاء ضحية لانتهاك أعراضهم بضغطة واحدة علي أحد أزرار الهاتف .

ومن خلال تقنية البلوتوث يقوم بإرسالها إلى جهاز الكمبيوتر ليدخلها إلى برنامج لمعالجة الصور بقصد دبلجتها بشكل معين، كأن يدخلها في إطار صورته أو صورة من أي نوع "آخر".

ثم ينطلق إلى الإنترنت حاملاً معه تلك الصورة ليعلقها على جدران المنتديات، أو أن يقوم بإرسال الصورة إلى المجموعات البريدية التي يشترك فيها آلاف الناس لتنتشر الصورة انتشار النار في الهشيم، الأمر الذي قد يقضي على مستقبل الفتاة.

سيناريو آخر وهو ما نراه في الأفراح حيث يقوم كل مدعو في الفرح بتصوير جميع الفتيات الموجودات اللاتي أوقعهن حظهن العاثر في براثن هؤلاء الشباب، ويا حبذا إذا قامت أحداهن بالتمايل يمينا وشمالا فيقوم علي الفور بتصويرها من أخمص قدمها حتى منبت شعرها، دون ادني تفكير أن فعلته هذه ممكن أن تحدث لأمه أو أخته في أي يوم من الأيام ـ مع العلم أن ظاهرة رقص الفتيات في الأفراح حرام شرعا طالما يوجد اختلاط .

وبعد استطلاع رأي 11 شخص من زملائي في أقسام الاقتصاد والثقافة والسياحة والسيارات والترجمة والبنوك الإسلامية حول هل تفضل ان يكون معك تليفون بكاميرا أو بدون، اتفق 9 منهم علي ان الموبايلات اللي بكاميرا تستهويهم وأنهم يعشقونها وواحد فقط قال "انا عايز اجيب موبايل بكاميرا لإبني "كريم" وواحد تاني من غير كاميرا ليا ـ حنان الأب ميتوصفش ـ أما آخر واحد قال انه بيحب الموبايلات اللي من غير كاميرا وما زال يحمل موبايل 3310 يعني في الآخر اصبحت النتيجة 81.8 في المائة للي عايزين موبايلات بكاميرات. يعني التكنولوجيا تكسب والبدائية تخسر ولا عزاء للفتيات.

«17» يوم تكشير

2007-05-29T10:39:00.000-07:00

الضحك هو ذلك الشيء الذي يخرج الإنسان من همومه ويدخله في عالم من السعادة والابتهاج، فقلما ضحك الإنسان من قلبه ضحكة هزت جسمه من كثر ما أطلقها للعنان، وقد توصل باحثون أن الطفل الرضيع يبدأ فى الضحك بعد مرور (17) يوماً من ميلاده، يعني الإنسان المفروض يضحك طول العمر، ما عدا 17 يوم فقط في حياته يكونوا من غير ضحك، يعني أيام النكد في حياة الإنسان بتكون 17 يوم بس ، فكل واحد مبوز مع زوجته أو خطيبته أو مع أصدقائه يضحك علي طول من غير تفكير "فهمان ولا مش فهمان".

وفي بعض الأمثال اللذيذة اللي تحولت من الحكمة إلى الضحك أزاي أقرءوها وأبقوا قولوا ضحتكوا ولا لاء

القرش الأبيض بيعوم في البحر الأحمر

ضربوا الأعور على عينه قالهم كسرتوا النضارة

اللي ميشفش من الغربال يكشف نظر

المال السايب يعلم الطلبة

نام وارتاح وكل عسل نحل التمساح

من خرج من داره مينساش يأخد المفتاح معاه

الباب اللي يجيلك منه الريح شيله وركب قبنوري

المضطر يركب التاكسي

رب صدفة خير من ألف ليلة و ليلة

مسير الحي يتسفلت

اللي بيته من إزاز ميغيّرش هدومه في الصالون

فاقد الشىء يدور عليه

تأتي الرياح محمله بالأتربة

ياخبر النهارده بفلوس بكرة ينزل عليه أوكازيون

اللي معاه قرش محيّره يجيب حمام ويحمّره

ياداخل بين البصلة وقشرتها حط قطرة علشان هاتدمّع من ريحتها

اصوم اصوم وافطر على المدفع

اللي يخاف من العفريت يعمل عبيط

المركب اللي فيها رايسين يلعبوا طاولة

اللي خدتوا القرعة تاخده ام الخلول

what اللي ميعرفش يقول

أكل العيش يحب الطعمية

lenses العين عليها

قالوا للحرامي أحلف قالهم: وحياه حسني وافراحه

جت الحزينة تفرح شغلت شريط حكيم وقعدت ترقص

قال يامحشحشين يكفيكوا شر الكمين

اللي ياكل لوحده يشبع

لاتبكي على اللبن فى البسكوت

اقطع عرق و حتة بتلو

اطبخي ياجارية.. الأنبوبة فاضية ياسيدي

لو حبيبك عسل ما تحطلوش طحينة

اللي يتلسع من الشوربة يتصل بالمطافي

وبكره ترجع ريما من عند خلتها في مارينا

اقلب القدرة على فمّها الفول يتدلق منها

دوامة الحياة

2007-05-12T10:21:00.000-07:00

أحنا علي فكرة يا جماعة بقينا عايشين حياة صعبة جدا وكل واحد فينا بيجري علي لقمة عيشه، مفيش حد فاضي عشان يسأل على حد كل واحد في وادي والناس كلها في وادي تاني.

يعني الواحد بقي شغال عشان يجيب فلوس و الفلوس ديه بتتصرف في حاجات مفيدة وغير مفيدة يعني مفيش فايدة الواحد هيفضل طول عمره كده شغال عشان الفلوس مش عشان حاجة تانية على رأي مثل بيقول "أهم حاجة الثبات علي المبلغ" مش المبدأ كما يقال، يعني كل حاجة أتغيرت والحياة واخدة الواحد في عالم زائل وهو مش واخد باله انه بكره هيقابل ربنا سبحانه وتعالي.

أنا نفسي ألاقي وقت عشان أقابل أحبائي وأهلي وأصدقائي أقابلهم كتير وأقعد معاهم زى أيام زمان لكن يا خسارة قول للزمان يرجع يا زمان مفيش فايدة .

الواحد كل ما يكبر في السن بيحس أنه هيعيش حياة تانية مليانة كل ما هو ممتع وجميل بس للأسف الظروف اللي محاوطة الناس مخلياهم بيدوروا في ساقية ومحدش عارف أمتي هيخلص دوره.

يمكن الحياة عايزة شوية كفاح ؟ طبعا، بس كمان عايزه مرح وضحك وأمل وتفائل ببكرة وعايزة مثابرة عشان الواحد يحقق اللي هو عايزة.

والفلوس مش هي المشكلة، يعني تخيلوا لو الوحد أصبح معاه كذا مليون جنيه هيعمل ايه ؟ هل هيفضل طول حياتة يتفسح ويسافر بلاد كتيرة من غير شغل . طبعا الحياة ديه هتبقي مملة يعني لازم الشغل عشان الواحد يحس أنه عايش وبينتج شيء مفيد، يفيده ويفيد غيره يعني لازم العمل بجانب الحياة عشان يبقي الحياة ليها طعم بس لازم برده يوازن بين شغله وبين علاقاته الاجتماعية والأسرية وصلة الرحم.

"خون بس متتقفش"

2007-04-29T13:31:00.000-07:00

أيه رأيكم يا جماعة في الأمثال العربية، وبخاصة الأمثال المثيرة للجدل مثل هذا المثل الشعبي القائل "خون بس متتقفش"، والمقصود أنك لازم متتمسكش وأنت بتخون ولو ده حصل هتكون يا حلو في حالة تلبس ويطرقع ليك (كما لو كنت اتمسكت في مظاهرة).

وعلي رأي فيلم " حرامية في كي جي 2" لما كريم عبد العزيز كان مع حنان ترك في الترام وعمل فيها شهم ومسك حرامي، مع أنه هو كمان حرامي، يعني عض في زميل له ، ولما مسك الحرامي قاله بصوت واطي شويتين ( مش عيب عليك تتمسك).

يعني أنك "تتقفش" حاجة مش كويسة في جميع الأحوال ولا أنتوا مش معايا، علي العموم ممكن نعمل زووووم للمشكلة عشان نركز عليها بعدسة كاميرات " الشماعة" ونشوف المشكلة فين كما قال سمير غانم " هي الكورة فين".

هناك تساؤل يطرح نفسه هل المشكلة في الخيانة أنك "تتقفش" مش أنك تخون؟، يا له من تساؤل محير، فالخيانة هي ذلك الشعور بالانكسار واليأس وفقدان الثقة في الذات وفي الناس جميعا، وبالذات لو كانت الخيانة من شخص قريب إلي نفسك.

تعالوا نشوف لو الراجل خان بيتقال عليه أيه بيقتال "نزوة" وهتعدي ولازم الست تسامح عشان البيت ميتخربش والعيال متتشردش .... إلخ، أما لو الست خانت طبعا مش هيتقال عليها نزوة زي الراجل لكن بيتقال عليها أنها مش “مؤدبة” وده أقل وصف ممكن يتقال.

يعني المشكلة هي نظرة المجتمع للاثنين بتكون مختلفة، والمجتمع بينظر علي خيانة المرأة علي أنها جريمة كبرى.
أنتم بقي شايفين أيه الخيانة واحدة للاثنين ولا للراجل حاجة وللست حاجة تانية مستنيكم جودو باي

رحلة إلى مجاهل "وادي الريان"

2007-04-22T06:11:00.000-07:00

مترو الأحضان

2007-04-10T23:43:00.000-07:00

إنذار المترو هيقفل علي رأس بني آدم" كان ده طبعا مش إنذار مسموع في ميكروفون المترو لكنه كان داخل عقلي.

كان هذا الإنذار سببه أن في واحدة هربت من زحمة الشوارع وقالت تأخذ أسهل وأسرع وسيلة مواصلات في مصر الا وهو مترو الأنفاق ، نسيت أقولكم أن البنت ديه كانت "سائحة" أجنبية ومعاها الـ "بوي فيرند" بتاعها وطبعا أصول "الجنتل مان" بتقول إن البنت تركب الأول وبعدين هو، وده اللي حصل فعلا ولحد اللحظة ديه كل شيء تمام التمام المترو بابه مفتوح والناس بتتسابق عشان تنزل وعلي الجانب الآخر ناس واقفة بالطوابير بتزق بعض كأنه طابور عيش طبعا أبو "شيلن" مش أبو "ريال"،واللي عرف ينزل أصبح من المحظوظين.

نرجع لمشهد البنت وهي أمام الباب الآن وتحاول أن تركب المترو و"البوي فيرند" بجانبها مستني لحد ما تحصل المعجزة ويجي دورها وتوصل لباب المترو وبعدين يكمل هو المسيرة ويحاول يأجر بلاطة في المترو عشان يقف عليها وتكون إيجار جديد مش قديم، وفي لحظة ما الست السايحة وهي بتركب، الباب بدأ يقفل وكان فاضل ثانية واحدة ويقفل علي رأسها وطبعا انتم عارفين يعني ايه باب اليكتروني يقفل علي رأس واحد النتيجة معروفة للجميع ، طبعا الناس كلها بتتفرج علي المشهد ده من غير ما يتحرك احد ويعمل حاجة لحد ما راح واحد شهم ـ عينه زايغة علي الموزة الأجنبية ـ من داخل المترو مسك الباب لحد ما عرفت تنزل من المترو وطبعا سواق المترو قعد يقول في الميكرون " الإنسان المحترم اللي ماسك الباب يسيبه" ومش عارف أن كان في واحدة ممكن يجرلها حاجة عشان الباب قفل فجأة.
وطبعا بسبب اللي حصل ده ممكن السائح يتعقد ويقرر يرجع بلده وننحرم من الدخل اللي بيخشلنا من السياحة المقدر بـ 1 % من الدخل العالمي للسياحة في حين أن مصر تمتلك ثلث آثار العالم.

وبذلك خلص المشهد ده واللي شافه كان اللي واقف داخل عربة المترو أما باقي الناس مشفتش أي حاجة وطبعا بعد ما ده حصل الشاب خد البنت في حضنه وهاتك يا أحضان وطبطبة ودلع علي رأي الست نانسي عجرم والناس اللي رايحة واللي جاية واقفة بتتفرج علي اللي بيحصل ومستغربة من اللي شيفينه من أحضان عيني عينك في عز الظهر ولأن الشاب كان واقف بظهره هو والبنت فمحدش عرف أنهم سياح وبكده أستغرب الناس أن المترو أصبح مكان لأحضان العشاق وتعدي مرحلة أنه مكان لمقابلة العشاق علي كراسي الانتظار الخاصة بالركاب

مريض دون سابق إنذار

2007-04-08T05:24:00.000-07:00

"على الرجاء من السادة الركاب إذا تواجد بينهم طبيب أو طبية سرعة التوجه إلى مكتب الناظر للأهمية"

كانت هذه الكلمات أول ما التقطته أذني داخل محطة مترو الأنفاق، والتي تعودنا على سماعها مرارا فعندما يصاب راكب بأزمة أي كان نوعها لا يجد من يسعفه لعدم توافر وظيفة طبيب داخل محطات المترو لمواجهة تلك الحالات الطارئة التي تحدث دون سابق إنذار.

وللأسف تكرر النداء أكثر من مرة لكن لم يستجيب أحد ومش لأن المصريين أنذال، ولكن لأنه لم يحالف الحظ ـ طبعا المأسوف علي أمره اللي تعب فجأة في المحطة ـ أن يكون متواجد في تلك اللحظة طبيب بشري ولا حتى بيطري.

وعلي العلم أن عدد محطات مترو الأنفاق في الخط الأول حلوان ـ المرج 35 محطة وفي الخط الثاني الجيزة ـ شبرا الخيمة 17 محطة. والمجموع كله 52 محطة بالتمام والكمال.

وفي النهاية الغلط راكب "البني آدام" ـ اللي تعب فجأة ـ من ساسه لراسه ، لأنه تعب دون سابق إنذار في محطة لمترو الأنفاق.
كيمو